Oʻzbekistonda 84 ta davlat aktivlari sotuvga qoʻyiladi

O‘zbekiston 84 ta kompaniyadagi davlat ulushlarini, 1,2 mingdan ortiq ko‘chmas mulk obyektlarini va qariyb 8 ming gektar yer maydonlarini sotuvga chiqaradi. Bu 28-avgustdagi PF-177-son prezident farmonida belgilangan. Xususiylashtirish dasturiga kiritilgan aktivlarning umumiy qiymati taxminan 100 trln so‘mga baholanmoqda. Yil oxirigacha ularni sotishdan kamida 14 trln so‘m tushum olish rejalashtirilgan.

Eng yirik lotlardan biri davlatga 98,9% aksiyasi tegishli bo‘lgan Turonbank bo‘ladi. Shuningdek, ustav kapitalining 100 foizi davlatga qarashli Xalq Sug‘urta kompaniyasi ham xususiylashtiriladi.

Transport sohasida Toshkent yo‘lovchi vagonlarini qurish va ta’mirlash zavodining 90% aksiyasi hamda “O‘zbekiston temir yo‘llari” tizimiga kiruvchi Andijon mexanika zavodining 100% ulushi sotuvga qo‘yiladi.

Ro‘yxatga quyidagilar ham kiritilgan:

• “O‘zekspomarkaz”ning 91,83% ulushi;
• Xalqaro hamkorlik markazining 79,27% ulushi;
• KO-UNG CYLINDER kompaniyasining 54,76% ulushi;
• Kor-UNG Investment kompaniyasining 50% ulushi;
• V-GEN BIOPHARMA kompaniyasining 50% ulushi;
• Inno Texnoparkning 100% ulushi;
• Ustudy kompaniyasining 50% ulushi;
• O‘ZBEK-TURK TEST MARKAZIning 51% ulushi.

“O‘zekspomarkaz” va Xalqaro hamkorlik markazini sotish alohida shartlar asosida amalga oshiriladi. Bu shartlar Prezident Administratsiyasi bilan kelishilishi kerak.

Dasturga Trastbankdagi davlat ulushi ham kiritilgan. Biroq u atigi 0,001%ni tashkil etadi. Mazkur paketni qo‘shimcha baholashsiz birja narxida sotishga ruxsat berilgan.

Xususiylashtirish yo‘l xo‘jaligi sohasini ham qamrab oladi. Davlat Avtomagistral korxonasi va yo‘llarni qurish hamda saqlash bilan shug‘ullanuvchi bir qator hududiy kompaniyalardagi ulushlarini sotishni rejalashtirmoqda.

Shuningdek, Namangan, Samarqand, Surxondaryo, Toshkent va Farg‘ona viloyatlaridagi dehqon bozorlari hamda savdo majmualaridagi davlat ulushlari ham sotuvga chiqariladi.

Davlat aktivlarini xarid qilish shartlari ham yengillashtirildi. Boshlang‘ich to‘lov 35 foizdan 15 foizgacha kamaytirildi. Investorlar uchun 7 yilgacha foizsiz bo‘lib-bo‘lib to‘lash imkoniyati yaratiladi. Yirik obyektlar uchun to‘lov belgilangan muddatda to‘liq amalga oshirilsa, 25 foizlik chegirma beriladi. Agar aktiv uch oy ichida sotilmasa, uning narxi bosqichma-bosqich pasaytirilishi mumkin.