Toshkent—Samarqand tezyurar temir yo‘li Xivagacha uzaytirilishi mumkin

Toshkent—Samarqand tezyurar temir yo‘l magistrali kelajakda Xivagacha uzaytirilishi mumkin. Bu haqda 5-may kuni Samarqand shahrida o‘tkazilgan Osiyo taraqqiyot banki Boshqaruvchilar kengashining 59-yillik yig‘ilishi doirasida transport vaziri o‘rinbosari Jasurbek Choriyev ma’lum qildi.

Uning so‘zlariga ko‘ra, hozirda Toshkent—Samarqand yo‘nalishining 300 kilometrlik yuqori tezlikdagi qismi loyihalash ishlari yakunlangan. Ushbu yo‘lakda safar vaqti atigi 1 soat 40 daqiqani tashkil etadi.

“Biz loyihalashni tugatdik. Keyingi bosqich — qurilishni davom ettirish. Nega uni Xivagacha uzaytirmaslik kerak?” — dedi Choriyev.

Agar loyiha amalga oshirilsa, Toshkentdan Xivagacha borish vaqti hozirgi 7,5 soatdan taxminan 5 soatgacha qisqaradi. Bu esa mamlakatning g‘arbiy hududlari bilan transport aloqalarini yaxshilab, turizm salohiyatini oshirishi kutilmoqda.

Mazkur yo‘nalishda Janubiy Koreyaning Hyundai Rotem kompaniyasi poyezdlaridan foydalanish ko‘rib chiqilmoqda, ammo boshqa variantlar ham istisno qilinmayapti. “Eng muhimi — temiryo‘l bo‘ladi”, — dedi vazir o‘rinbosari.

Avvalroq Janubiy Koreya kompaniyalari konsorsiumi Toshkent—Samarqand tezyurar temir yo‘l loyihasining texnik-iqtisodiy asoslanishi bo‘yicha yakuniy hisobotni taqdim etgan edi. Transport vazirligi hujjatni tender e’lon qilishdan oldin qayta ishlab chiqib, investorlar uchun yanada jozibador qilishni rejalashtirmoqda.

Shuningdek, 5-maydan boshlab Toshkent va Xiva o‘rtasida Hyundai Rotem tomonidan ishlab chiqarilgan “Jaloliddin Manguberdi” tezyurar poyezdi qatnovi yo‘lga qo‘yildi. Ushbu poyezd yetti vagondan iborat bo‘lib, soatiga 250 km tezlikka erisha oladi.