O‘zbekistonda davlat chegarasi orqali yerosti tunnellari qurish uchun jinoiy javobgarlik joriy etildi

Oʻzbekiston Senati Jinoyat va Jinoyat-protsessual kodekslariga davlat chegarasi orqali yer osti tunnellarini qurish va ulardan foydalanish uchun alohida jinoiy javobgarlikni belgilovchi oʻzgartishlar kiritish toʻgʻrisidagi qonunni tasdiqladi.

Qonunchilikni kuchaytirishga 2016–2025-yillar davomida aniqlangan 12 ta noqonuniy tunnel sabab bo‘ldi. Mazkur tunnellar orqali tovarlar, valuta mablag‘lari va boshqa moddiy boyliklarni kontrabanda yo‘li bilan olib o‘tishga urinishlar qayd etilgan. Qonunda davlat chegarasi orqali noqonuniy yerosti tunnellarini qurish, ulardan foydalanish va ularni moliyalashtirish, shuningdek, tunnel yordamida chegarani kesib o‘tish hamda kontrabanda bilan shug‘ullanish uchun jinoiy javobgarlik nazarda tutilgan.

Shu bilan birga, hujjatda insonparvarlik tamoyili ham saqlab qolingan. Bunday qilmishni birinchi marta sodir etgan shaxs tunnel haqida hokimiyat organlariga ixtiyoriy ravishda xabar bersa yoki jinoyatni fosh etishda faol yordam ko‘rsatsa hamda uning harakatlarida boshqa jinoyat tarkibi bo‘lmasa, jinoiy javobgarlikdan ozod etilishi mumkin.

Noqonuniy tunnellar bilan bog‘liq jinoyat ishlarini tergov qilish vakolati Davlat xavfsizlik xizmati tergovchilariga yuklatildi.