O‘zbekiston va Osiyo taraqqiyot banki (OTB) 2030 yilgacha umumiy qiymati 12,5 mlrd dollarlik yangi loyihalarni amalga oshiradi

Oʻzbekiston Prezidenti Shavkat Mirziyoyev va Osiyo taraqqiyot banki prezidenti Masato Kanda 2030-yilgacha boʻlgan strategik hamkorlikning yangi dasturini muhokama qildi. Unda umumiy qiymati 12,5 milliard dollarlik qoʻshma loyihalarni amalga oshirish koʻzda tutilgan. Uchrashuv 3-may kuni Samarqand shahrida OTB Boshqaruvchilar kengashining 59-yillik yigʻilishi doirasida boʻlib oʻtdi.

OTB rahbari uchrashuvni tashkil etishda koʻrsatgan yordami uchun Oʻzbekiston tomoniga minnatdorlik bildirdi. Forumning 16 yildan soʻng Samarqandda oʻtkazilishi Oʻzbekistonning Markaziy Osiyodagi bankning asosiy hamkorlaridan biri sifatidagi roli mustahkamlanganidan dalolat beradi.

OTBning Oʻzbekistonga kiritgan sarmoyalarining umumiy hajmi shu kungacha 15,5 milliard dollardan oshdi. Ushbu koʻrsatkich boʻyicha respublika mintaqada ham, dunyoda ham bankdan eng koʻp moliyalash oluvchilar qatoriga kiradi. 2025-yilda OTBning yillik majburiyatlari 1,4 milliard dollardan ortiq rekord darajaga yetdi.

Asosiy mablagʻlar iqtisodiyotning bazaviy tarmoqlariga yoʻnaltiriladi. Transport sohasiga 3,1 milliard dollar, energetika sohasiga 2,9 milliard dollar sarmoya kiritildi. Suv, kanalizatsiya va shahar xizmatlari loyihalari 1,4 milliard dollarni tashkil etadi. Xususiy sektorni qoʻllab-quvvatlash, byudjetdan moliyalashtirish va boshqa sohalarga qariyb 7,2 milliard dollar ajratildi.

Loyihalarning amalga oshirilishi natijasida 1400 kilometrdan ortiq temir yoʻl va 1700 kilometrga yaqin avtomobil yoʻllari modernizatsiya qilindi. 4 ming kilometrga yaqin suv tarmoqlari yangilandi. 750 ga yaqin ta’lim muassasasida kapital ta’mirlash ishlari olib borildi. Ushbu chora-tadbirlar hududlarning transport aloqasi va ijtimoiy xizmatlardan foydalanish imkoniyatlarini oshirdi.

2030-yilgacha boʻlgan yangi hamkorlik dasturi iqtisodiyotni yanada oʻzgartirishga qaratilgan. U 2,6 milliard dollar infratuzilma loyihalarini moliyalashtirish, 2,2 milliard dollar samaradorlikka asoslangan kreditlash va 3,3 milliard dollar islohotlarni moliyaviy qoʻllab-quvvatlashni oʻz ichiga oladi.

Dasturning alohida bloki davlat-xususiy sheriklik loyihalariga bagʻishlangan. Ularning umumiy hajmi 1,7 milliard dollarga baholanmoqda. DXSh infratuzilma, energetika va ijtimoiy sohalarga xususiy investitsiyalarni jalb etishning asosiy mexanizmlaridan biriga aylanishi kutilmoqda.