Moskvadagi Gʻalaba paradi 19 yil ichida birinchi marta harbiy texnikasiz oʻtkaziladi

Rossiyada 2026-yil 9-may kuni Moskvada o‘tkaziladigan G‘alaba kuni paradı qisqartirilgan formatda bo‘lib o‘tadi. Qizil maydondagi tantanali marshda yer usti harbiy texnikasi, shuningdek, Suvorov va Naximov harbiy bilim yurtlari hamda kadet korpuslari tarbiyalanuvchilari qatnashmaydi. Bu haqda Rossiya Mudofaa vazirligi 28-aprel kuni o‘zining Telegram-kanalida ma’lum qildi.

Vazirlikka ko‘ra, mazkur qaror “joriy operativ vaziyat” bilan bog‘liq. Shu bilan birga, paradning aviatsiya qismi saqlab qolinadi — unda jangovar samolyotlar ishtirok etadi.

Parad qisqartirilgan shaklda o‘tkazilishi mumkinligi haqidagi xabarlar avvalroq ekspertlar va ommaviy axborot vositalarida paydo bo‘lgan edi. Ayrim jurnalistlar va siyosatshunoslar Moskva shahrida aprel oyining oxirida harbiy texnika ishtirokidagi repetitsiyalar o‘tkazilmaganiga e’tibor qaratgan.

Shu bilan birga, Rossiyaning bir qator hududlarida 9-mayga bag‘ishlangan ommaviy tadbirlar bekor qilinmoqda. Xususan, Nijniy Novgorod, Saratov, Chuvashiya va Kaluga viloyatida paradlar bo‘lib o‘tmaydi. Voronej, Kursk, Bryansk va Belgorod viloyatlarida esa bayramona feyerverklar bekor qilindi. Mahalliy hokimiyatlar bu qarorlarni xavfsizlik masalalari bilan izohladi.

So‘nggi oylarda Rossiya hududidagi infratuzilma obyektlariga berilgan zarbalar ushbu fonni shakllantirmoqda. Ukraina turli hududlardagi, jumladan, Boltiq dengizi portlari va Tuapse shahridagi neftni qayta ishlash zavodiga hujumlar haqida bayonotlar bergan.

Rossiyada 9-may paradida harbiy texnika doimiy ravishda 2008-yildan buyon namoyish etib kelinadi. 2025-yilda G‘alabaning 80 yilligi munosabati bilan o‘tkazilgan tadbirda 10 mingdan ortiq harbiy xizmatchi va qariyb 200 ta texnika namunalari qatnashgan edi.

Shu orada Ukraina prezidenti Vladimir Zelenskiy Yerevanda bo‘lib o‘tgan Yevropa siyosiy hamjamiyatining VIII sammitida so‘zga chiqib, Moskvadagi parad formatini Rossiya imkoniyatlaridagi o‘zgarishlar bilan bog‘ladi.

"Rossiya 9-may kuni parad oʻtkazilishini e’lon qildi, ammo bu paradda harbiy texnika boʻlmaydi. Agar bu toʻgʻri boʻlsa, koʻp va koʻp yillar davomida birinchi marta paradda qurol boʻlishini koʻzdan kechira olmayapti. Unda Ukrainaning dronlari ham uchishi mumkin", — deydi Zelenskiy.